Hondakinen bilketa eta kudeaketa etengabe hobetzen ari da Arabako Mendialdean, baina gainerako udalerrietan bezalaxe, erritmo motelegian, legean ezarritako helburuak garaiz lortzeko. Hala, beste kuadrilletan bezala, bildutako hondakin gehienak zabortegian amaitzen dira; hala ere, kopurua %50etik behera dago lehen aldiz. Bestalde, birziklapenak puntu bat egin du gora 2021eko datuekin alderatuta. Gainera, pandemiaren ostean normaltasunera itzultzeak mesede egin dio Arabako Mendialdeko Kuadrillari, eta hondakin gutxiago sortu ditu behin hirietatik etorritako behin behineko migranteak bere lehen etxebizitzetara itzuli direnean.
Guztira, 1.844 tona hondakin sortu ditu eskualdeak, 2021ean sortutako 2.023 tona hondakinen aurrean. Biztanle bakoitzak, berriz, 582 kilo hondakin sortu ditu 2022an. Kanpezu (639 tona) eta Arraia-Maeztu (440) dira hiri hondakin gehienak sortzen dituzten udalerriak. Bestalde, gaikako bilketaren daturik onenak Bernedon (%48), Urizaharrean (%47) eta Kanpezun (%43) ikusten dira.
