Aguraingo Lope de Larrea ikastolaren 50. urteurrena ospatzeko argazki erakusketa bat inauguratu du bertako hezkuntza komunitateak. 50 urte, ehunka argazki, milaka istorio izena eman diote hilaren 15ean Aguraingo kale Nagusiko Zabalarte aretoan inauguratu duten erakusketari. Urtarrilaren 8ra arte izango da zabalik.
Ohar batean ezagutarazi dutenez, urteurrena ospatzeko ekitaldien artean "berezienetakoa" da oraingo hau. Ez da laginketa urria egin dutena, mila argazki inguru bildu dituztelako.
Nabarmendu dutenez, ikasleek, irakasleek eta gurasoek hartu dute parte ekimenean, "denboran bidaiatzeko" asmoarekin. "Urte hauetan guztietan bizi izandakoak gogoratu eta sentitu" nahi izan dituzte. Hortaz, "gelakide eta irakasleak gogoratzeko aukera" izango dute bertaratzen direnek: barnetegietara egindako txangoak, Argitxoren bisitak, Olentzero eta Mari Domingiren txabolara egindako irteerak edota Lardero eta inauterietan egindako ekimenak. "Horrekin batera, ikastolaren historia, erronkak, aldarrikapenak eta aldaketak ere" jaso dituzte irudietan.
Gogora ekarri dutenez, 1973/74ko ikasturtean ekin zion bideari egungo ikastolak. "Euskaran sinisten zuten guraso gutxi batzuek ekin zioten erronkari, bidean topatutako oztopoei aurre egin, eta lagunak bilduz". Lan horren ondorioz, ikastola "Lautadako erreferente" bihurtu dela nabarmendu dute.