Konpostaje planta bat eraikitzea, Asparreneko aurrekontuen proiektu nagusien artean

Erredakzioa 2022ko abe. 5a, 17:00
Asparreneko udaletxea, Araian. / ALEA

Udalak lau milioi euroko aurrekontua eta 1,9 milioi euroko inbertsio plana onetsi ditu 2023rako. Proiektu nagusiak Santsaerreka kalearen eraberritzea eta Estatuko aurrekontu orokorrek 700.000 eurorekin finantzatutako konpostaje planta izango dira.

Joan den ostegunean, abenduaren 1ean, Asparreneko Udalaren osoko bilkurak onartu egin zuen 2023rako aurrekontua: lau milioi euroko proiektu ekonomikoa (2022an baino 400.000 euro gehiago), eta, horrez gain, 1,9 milioi euroko inbertsio plan gehigarria.

Aurrekontuaren proiektu nagusien artean, konpostaje planta bat eraikitzeko obrak nabarmentzen dira. "Asparrenak konpromiso sendoa du klima aldaketaren aurkako borrokarekin. Horrela, efizientzia energetikoa hobetzeko, kontsumoa murrizteko eta energia berriztagarriak sortzeko hainbat inbertsio egin ondoren, aurten hondakinen kudeaketan zentratuko gara", azaldu du Txelo Auzmendi alkateak. EH Bilduk eta Espainiako Gobernuak Madrilen lortutako akordioari esker, Estatuko aurrekontu orokorrek 700.000 euroko ekarpena egingo diote proiektuari.

Hala ere, inbertsiorik handiena, 800.000 euro baino gehiagokoa, Santsaerreka kalea eraberritzeko izango da. Obra horiek amaitu bitartean, Asparrenak Presalde kaleko beste bide bat urbanizatzeko proiektua landuko du. Uraren hornidura eta saneamenduko ohiko partida ere handitu egin du Udalak. Era berean, Marutegiko Gaztelua sustatzeko eta kontserbatzeko lanean ari den Uharka elkarteari zuzendutako 15.000 euroko partida bat ere onetsi dute.

2023ko aurrekontuak alde batera utzita, Asparrenak onetsitako inbertsio planaren barruan, bi proiektu nabarmentzen dira batez ere: 500.000 euro Arrazpi kiroldegia birgaitzeko obrak hasteko, eta beste 300.000 euro Herriko Plazan etxebizitza bat erosteko.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide