Hainbat urtez ikerketa lanak egin ostean, 2007an, Ilarduia, Egino eta Andoingo bizilagunei esker herri inauteriak berpiztea lortu zuten. Gerra ondorengo urteetan galdu baziren ere, egun bizirik daude eta gaurkoan ere horrela erakutsi dute. Ezohiko eguraldi onak lagunduta, Andoin, Egino eta Ilarduiak bat egin dute berriz ere ospakizun berezi honetan.
Ibilbidea Ilarduian hasi da. Mozorro tradizionalez jantzitako lagunak etxez etxe dantzan joan dira, eta bidean zehar jakiak oparitu dizkiete bizilagunek. Asparreneko herri inauteri hauetan lastozko gizona da protagonista. Gaitz guztien errua leporatzen zaio pertsonaia honi, eta asto baten gainean lehenengo, eta idiz jantzitako porreroen bizkarrean ondoren, herrietatik paseatu eta su eman diote ospakizunari amaiera emateko.