"Gogoratu, neskak: Halloween dator, eta mozorroa beldurra ematean datza, ez zuek enpotratzeko gogoa ematean". Amurrioko udaltzainarena eraso bat da: jarrera eta komentario matxista argia, herrian "autoritate poliziala" den uniformedun pertsona baten partetik. Emakumeak sexualizatzen eta gizonek gu "enpotratu" gaitzaten ardura eta errua emakumeon gain jartzen.
Ez da kasu isolatu bat, Amurrion azken hilabeteetan esango genuke udaltzainen jarrerak jarrera feministak izatetik oso urrun kokatzen direla.
Are gehiago, ez da Amurrioko kasuan bakarrik gertatzen den arazo bat. Indar polizialek daukaten kirats neomatxista izugarria da azkenaldian.
"Sortu ditzagun gure artean aliantza feministak eta antolatu gaitezen"
Bitartean, Amurrioko Udala itsu-mutu-gor. Berdintasun plan eta protokolo instituzionalak berritzearekin ahoa bete, baina, zertarako balio digute halako paperek gero praktikan ez bada inolako neurririk hartzen halako jarrera matxisten aurrean? Zertarako balio dute praktikan jartzen ez badira?
Zelan suposatzen da sentitu behar garela gure kaleetatik horrelako pertsonaiek gure herriko protokoloaren ardura (beste batzuen artean) baldin badaukate?
Neurriak hartzeko eskatu eta exijitu behar diegu instituzioei, haien kabuz egingo ez duten zerbait bada ere.
Ikusten ari garen moduan, poliziak ez gaitu zaintzen. Gure lagunek bai! Sortu ditzagun gure artean aliantza feministak eta antolatu gaitezen, horrelako erasoen aurrean.
Sinatzailea: Otsemeak, Amurrioko neska* gazte feministen taldea.
‼️ ADI! BESTE BEHIN ERE ERASOTUAK IZAN GARA.
— OTSEMEAK! (@Otsemeak) October 30, 2022
Hau da Amurrioko munipa batek bere instagrameko perfil publikora igo duen bideoa.@Amurrioberdin @AmurrioUdala ikusi duzue?
NAZKATUTA GAUDE! #EntzunGaitzatela pic.twitter.com/AOAzr6n2c0
Iritzi artikulu hau argitaratzean, ALEAk ez ditu bere gain hartzen egileak adierazitako iritziak, ezta horiekin lotutako erantzukizunak. Zure iritzia bidali nahi baduzu, idatzi erredakzioa@alea.eus helbide elektronikora.
