Horrez gain, Goiena hedabideko Mirari Altube Arrese eta Aitor Agiriano Arrese kazetariek Aramaioko Sanmartinak 2023 jaien jarraipen berezia egin dute egunotan:
Ekainak 30, ostirala
Aramaioko sanmartin jaien hasiera
Hemen Debagoiena saioak jaietan jarraitzen du eta Aramaioko Sanmartinen hasiera jaso du. Txupinazoa Dukiena jatetxeko ugazaben eskutik, Anbotoko Mariren jaitsiera eta gehiago izango dira Goiatz Arana kazetariak aurkeztutako saioan, hainbat gonbidatuk lagun eginda.
Gogoz hasi dituzte Sanmartinak Aramaion
Dukiena jatetxeko ugazabek izan dute aurten txupinazoa botatzeko ardura; hain zuzen, Edurne Isazelaia eta Dioni Elorza izan dira udaletxeko balkoian. Aurrez baina, Anbotoko Mariren jaitsiera ikusteko aukera izan dute gerturatu diren herritarrek. Gaur hasi eta astelehena bitartean izango da zertaz gozatu Aramaion.
Uztailak 1, larunbata
Patata-tortilla onena nork egingo lehian
Patatak, arrautzak, gatza eta olioa jaso dute antolakuntzaren eskutik parte hartzaileek eta nahi eran prestatzeko aukera izan dute. Errezeta ezberdinak mahai gainean jarrita, Haritz Errastik egindakoa izan da onena nagusien kategorian eta haurrenean, berriz, Izaro Telleria eta Xabi Rok egindako tortilla izan da goxoena. Itxura, mozketa eta zaporea izan ditu epaimahaiak kontuan irabazlea erabakitzerako orduan.
Egurrezko jolasak, txikienen gozagai
Egurrezko jolasetan aritzeko aukera izan dute Aramaioko haurrek, Herriko Plazan. Gustura aritu dira hala lagunartean jolas ezberdinak probatu eta bakoitzaren trebeziak erakutsiz. 0 eta 3 urte bitarteko haurrek ere izan dute propio jolaserako gunea.
Uztailak 2, igandea
Harrera egin diete iazko jaietatik hona jaio diren lau umeri
Gaur arratsaldean, iazko festetatik jaio diren lau ume aramaioarrei ongietorria egin diete. Kalejira elizan hasi da eta handik plazara joan dira dantzariek lagunduta. Behin plazan, zapia jantzi diete txikiei eta ondoren, dantzariek dantza-erakustaldia egin dute. Gainera, omenaldia jaso dute dantza-taldeko irakasle eta zenbait kidek.
Eusko Labeldun saiheskia, Sanmartinetan
Herriko Plazan parrila jarri eta bertan prestatutako saiheskia dastatzeko aukera izan zuten Aramaion. Urteroko hitzordu bihurtu da hala Eusko Label produktuekin mokadutxoa jateko tartea hartzea, herriko jaietan.
Uztailak 3, astelehena
Kuadrillen arteko pikie, bixi-bixi
Kuadrillen arteko pikie egin dute San Martin jaien barruan. Sei talde animatu dira parte hartzera eta lau proba eta finala gainditu behar izan dute garaipena lortu ahal izateko. Beste urte batez, katxi-toldo proba izan da arrakasta gehien izan duena. Aurten, Skykraft taldeak lortu du garaipena. Hala, aurreko urtean ere irabazle izanda, bi urtez lortu du taldeak lehen postua.
Kronika, argazki galeria eta bideo hauek GOIENAk argitaratu ditu eta Creative Commons by-sa lizentziari esker ekarri dugu ALEAra. Jatorrizko albisteak hemen dituzu osorik ikusgai.
