"Urtero ez dira hiru txapel irabazten"

Erabiltzailearen aurpegia Goiena 2018ko urt. 10a, 10:02

Asier del Campo pilotari aramaioarrak hiru txapel irabazi ditu –kadete mailan– azken bi hilabeteetan: Arabako Buruz Buruko Txapelketa, Arabako Binakako Txapelketa eta Arabako Trinket Txapelketa.

2017. urte bukaera borobila izan du kadete mailan –15 urte– jokatzen duen Asier del Campo pilotari aramaioarrak, hiru txapela bereganatuta. Lehena azaroaren 11n, San Martin egunean, irabazi zuen, Ogeta pilotalekuan, Asier Piconen aurka, 18-11. Del Camporen esanetan, garaipen hark konfiantza handia eman zion aurrera begira. "Ez neukan sekula bakarkako txapelketa bat irabazita, eta garaipen harekin asko poztu nintzen", azaldu du.

Bigarren txapela abenduaren 16an etorri zen. Joseba Letona bikotekidearekin, Mikel Aranbarriri eta Jokin Larrietari 22- 16 irabazi zioten, hura ere Ogetan. Bere hitzetan, garaipen hura ere ez zen erraza izan. Izan ere, eskuak minduta zituztela iritsi ziren finalera, bai bera eta baita Letona ere, eta horrek zaildu egin zizkien gauzak. "Finalaurrekoa irabaztea lortu genuen, eta, behin finalera iritsita, irabazi beharra genuela pentsatu genuen, finalak irabazteko direlako. Zorionez, hala izan zen", azpimarratu du Del Campok.

Hirugarren garaipena, eta azkena, pasa den zapatuan lortu zuen aramaioarrak, Gasteizko Estadio trinketean. Alai Lomanaren aurka jokatu zuen eta uste baino errazago nagusitu zen, 30-6. Lomanak trinketean esperientzia handirik ez duela azaldu du Del Campok, eta horrek ere nolabaiteko abantaila eman ziola berari. "Lomana finalera iristea sorpresa izan da. Nire aurkari gogorrena beti izan da Markel Aranbarri, txikitatik, eta Lomanak final-laurdenetan kanpoan utzi zuen. Harritu egin ninduen, baina gauzak ondo egin dituen seinale. Hala ere, bere urduritasuna edo nire esperientzia, ez dakit zer izan zen gakoa, baina irabaztea lortu nuen, eta oso pozik nago. Urtea nahi nuen moduan bukatu dut, hiru txapelekin", nabarmendu du Del Campok.

Oso pozik

Hiru garaipen horiekin "oso pozik" dagoela aitortu du. "Urtero ez dut izaten hiru txapel irabazteko aukera, eta gustura nago lortu dudanarekin. Beti gura izan dut buruz buruko txapela irabazi, eta horrek eman dit poz handien, baina beste biak ere garrantzitsuak izan dira niretzat", adierazi du.

Gaztetxoak ere bikain

Infantil mailan, Danel Herrartek eta Markel Arriolabengoak bi final jokatu zituzten abenduaren 31n, bikoteka. Bata Adurtzan –Gasteiz– eta bestea Antzuolako Gabon Kopan. Nahiz eta bi partiduak galdu, maila txukuna eman zuten.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide