Urtebeteko kartzelaratze eskaera jaso du Alfredo Remirezek, @erreharria txiolari amurrioarrak. Bere abokatuaren esanetan, Madrilgo epaitegiak urtebetez sartu nahi du kartzelan.
Epaitegiko 1. Sekzioaren arabera, duela aste batzuk zigortu zuten 2012an, 2013an eta 2014an terrorismoa goratzeagatik. Argudio horiek ahalbidetu lezakete 2009ko zigorra indarrean sartzea. Izan ere, 2009an epaileek urtebetez kondenatu zuten delitu bera egotzita, Amurrioko txupinazoan preso baten irudia erakusteagatik.
Espetxealdia bertan behera geratu zen -2 urte baino gutxiagokoa zelako- eta 5 urtez utzi zuten baldintzapeko askatasunean. 2017an berriro epaitu dute sare sozialetan terrorismoa goratzeagatik. Alabaina, delituak 2012an, 2013an eta 2014an bete zirenez, Auzitegi Nazionalaren iritziz, hautsi egin dira 2009ko zigorra bertan behera uzteko baldintzak.
Helegitea
Alfredo Remirezen abokatuak 3 egun izango ditu helegitea aurkezteko. Hala ere, legegileak uste du jurisprudentzia ugari dagoela Auzitegi Nazionalaren erabakiaren aurka.
"Legearen oso interpretazio zurruna egin dute, aditu askok adierazi dute epaiarena dela aintzat hartu behar den data, eta ez delituena. Hortaz, Alfredoren kasuan 2017an izan da epaia eta 5 urteko zigor etenaldia gaindituta zegoen", adierazi dio Aiaraldea hedabideari.
Jazarpena
Egoeraren aurrean, Auzitegi Nazionalaren jokaera salatu du Remirezek, "Ez nau bakean utzi nahi". Jasaten ari den jazarpena dela-eta, iragarri du mobilizazio deialdiak egongo direla.
