Manifestua

Euskara itxialditik kalera ateratzeko garaia da

Erabiltzailearen aurpegia
Astearte honetan Amaia Zentroan aurkeztu dute manifestua. / ZAZPIGARREN ALABA

"Agintarien aldetik, baliabideak egoeraren larritasunaren neurrira jartzea eskatzen du, euskarak aurrekontu orokorrean hartzen duen zati nimiñoa ez baita guraizeekin ukitu daitekeen zerbait".

Pandemiak Gasteizko euskalduntze prozesuan era zuzenean izan du eragina, ikastetxeak itxi eta bereziki haur eta gazteei eragin dien konfinamendu latzarekin. Euskararekiko etena erabatekoa izan da Arabar familien ehuneko handi batentzat.

Euskararen erabilera lehendik ere txikia zen herrialde honetan atzerapauso ikaragarria igarriko dugu irailean. Gaitasunean, eta, ondorioz, jarreretan izango du eragina, eta oso negatiboa izan daiteke.

"Euskararekiko etena erabatekoa izan da Arabar familien ehuneko handi batentzat"

Manifestu hau sinatzen dugun elkarteok eta eragile sozialok iniziatiba ugari bertan behera utzi behar izan ditugu, eta, beraz, euskarari egiten genion ekarpena asko murriztu da. Egoera hau ikusita, deseskalatzearekin batera, argi dugu galdutako eremu hori berreskuratzen hastea lehentasunezkoa dela, eta horretarako elkarlana ezinbestekoa izango dela.

Sei hilabete izan dira praktikan, eta Gasteizko familien gehiengoa erdara hutsez komunikatzen dela kontuan hartuta, inoiz baino beharrezkoago ikusten dugu guzti honen aurretik esku artean genuen lanarekin jarraitzea. Guk bezala hainbat elkartek.

Arabako Foru Aldundian eta Udaletxean mugimendu arraroak ikusten hasi gara, eta bertan behera geratutako milaka ekintzez gain, egin daitekeenaren aurrekontua murrizteko artazia zorrotz dator, euskararen biziraupena arriskuan jarriz, euskara ez baita lehentasuna gure agintarientzat.

"Egin daitekeenaren aurrekontua murrizteko artazia zorrotz dator, euskararen biziraupena arriskuan jarriz"

Hala ere, zorionez, herrigintza eta euskalgintza dinamika berriak martxan jartzeko ahaleginean ari da. Berrasmatu ditzagun, irailerako utzi gabe. Egongo den atzerapausoak tamainako erantzuna behar du: agintarien aldetik, baliabideak egoeraren larritasunaren neurrira jartzea eskatzen du, euskarak aurrekontu orokorrean hartzen duen zati nimiñoa ez baita guraizeekin ukitu daitekeen zerbait. 

Berriz diogu, kolpe latz hau konpentsatzeko dinamika zein mekanismo berriak martxan jartzea ezin da guztiz erori elkarteon, eragile sozialon eta herritarron bizkar. Udaletxe, Aldundi zein Eusko Jaurlaritza martxan jarri behar dira, eta maldan behera jausi den Arabako euskalduntze prozesuari behar duen bultzada emateko, eskura dituzten tresna guztiak aktibatuz.

Horien artean, diru laguntzak eta hitzarmenak bermatzeaz gain, baliabideak handitzea, zerbitzu publikoak berrezartzea eta egoera berrira egokitzea ere egon behar da: Udalekuak, ludotekak, Gizarte Etxeak, liburutegiak, zinemak, antzokiak, kaleak…

"Zerbitzu publikoak berrezarri eta egoera berrira egokitu behar dira"

Orain, inoiz baino gehiago, aisialdi eta kultur jarduerak behar ditugu, baita eskolaz kanpoko ekintzak ere, eta baliabide eta espazioak dituztenek ezin dute beste alde batera begiratu. Ezin dugu 6 hilabetez euskara ureztatu gabe hiltzen utzi, urteetako lana alperrik galduko genuke bestela.

2020-2021 ikasturtearen hasieran ahalik eta egoera osasuntsuenean iritsi dadin martxan jartzeko garaia da.

Manifestua sinatu duten elkarteak eta eragile sozialak: Euskharan, Zazpigarren Alaba, Betiko Gasteiz, Judimendikoak, Gasteiz Txiki, Arabako Bertsozale Elkartea, Gasteizko Ikasle Abertzaleak,  Gasteizko Bilgune Feminista, Errota Zaharra, Uribe Nogales, Elkartzen, Erreka Txiki, Bost Urki, Hegoaldekoak, Zabalgana Euskara Taldea (Zet), Odon De Apraiz Ikastola, Arantzabela Ikastola, Errekaleor Bizirik, Aranbizkarrako Gazte Asanblada, Gasteizko Askapena, Umandi Ikastola, Barrutia Ikastola, Hegoalde Euskaltegia, Gasteiz Kantuz.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide