Plaza Berria

Gorka Urtarani gutuna

Erabiltzailearen aurpegia
Gasteizko plaza enblematikoa airetik ikusita. / Argazkia: Mikel Arrazola (irekia.eus)

"Arazoa ez da izena bakarrik, izen hori noiz eta zein modutan jarri zen baizik: 1936. urtean Errepublika plaza zenari altxatuek izena aldatu zioten".

Gorka Urtaran alkate agurgarria,

Urtarrilaren 15ean Radio Euskadin egin zenituen adierazpenek harrituta utzi ninduten. Plaza Berria izendatzeko debatea zentzugabea eta antzua dela esan zenuen.

Hitz horiek mingarriak dira ekimena bultzatu eta sinatu dugun ehunka gasteiztarrontzat. Arazoa ez da izena bakarrik, izen hori noiz eta zein modutan jarri zen baizik: 1936. urtean Errepublika plaza zenari altxatuek izena aldatu zioten.

Gure hiria ikur frankistekin josi zuten eta galtzaileen umiliaziorako beste adibide bat izan zen Espainia plaza, frankismoa goraipatzeko izen berria horrela omenduz:

"(...) en homenaje a la España ultrajada, viva representación de las aspiraciones del verdadero Pueblo Español, que ajeno a toda otra idea, tan solo aspira al engrandecimiento y salvación de la patria"

Geroztik, milaka kaleri aldatu zaie izena bai Euskal Herrian eta baita estatuan ere. Ezin ahaztu Gasteiz etorbidea Avenida del Generalisimo zenik, edota Frantzia kalea Calvo Sotelo, besteak beste.

Zoritxarrez, izen eta ikur dexente daude aldatzeke oraindik. 2012.urtean Gasteizko udalbatzak Reina Sofia eta Juan Carlos I. hiribideak Gernika eta Durango gisa izendatzea onartu zuen, zure baiezko botoarekin. Garai hartan Maroto izan zen Udaleko Gobernu Batzarrak azken hitza izanda, aukera hori baliatu zuena proposamenak aurrera egin ez zezan.

Gaur egun zure taldearen esku legoke eskumen hori. Zergatik garai hartan ondo zegoenak ez du gaur egun balio? Zergatik eman zenion debate antzu bati baiezkoa orduan?

Bukatzeko, ezin ahaztu aldarrikatzen dugun izena Justo Antonio Olagibel arkitektoak jarri zuela, plazaren lehen izena. Izen hau ez da inon ageri, ez plazan ezta ekimen ofizialetan ere.

Sinatzaileontzat ez da tontakeria bat, frankistek ezarritako izena duintasunez aldatzea baizik.

Adierazitako hitzei erreparatuko diezulakoan,

Adeitasunez,

Gasteiztar. Plaza Berria izendatzeko sinadura bilketaren bultzatzailea

Erlazionatuak

ALEAkideek Plaza Berria izena nahiago dute

Gasteiz

Gasteizko iritzi publikoa astindu duen azken eztabaidaren inguruko inkestaren emaitzak baditugu: bozkatu duten 104 ALEAkideetatik, %96,15ak Plaza B...

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide