Ahobizi eta Belarriprest rolez lagunduta, ahal den guztietan, herritarrek euskaraz egitea nahi dugu. Horixe da funtsa: ahalik eta euskara gehien egitea.
Beraz, Euskaraldia ez da izango euskararen alde gaudela esateko ekimen huts bat, ezta egun bateko festa bat ere. Aitzitik, eguneroko hizkuntza-ohituretan eragiteko saio bat izango da. Horretan ezinbesteko betekizuna izango dute Ahobizi eta Belarriprest rolak hartuko dituzten pertsonek, horiek bultzatuko baitute egunerokoan euskara txertatzea.
Hortaz, Euskaraldian parte hartzeko, geure burua prestatu behar dugu. Ondo ulertu behar da zer den Ahobizi eta zer den Belarriprest, eta figura bakoitzak eskatzen dituen konpromisoak ondo bete behar dira. Ahobiziek ahal den guztietan eutsi beharko diote euskaraz egiteari: lehen hitza euskaraz egin, eta, elkar ulertuz gero, halaxe jarraitu. Belarriprestek, ostera, ahalbidetu beharko dute euskaraz berba egin ahal izatea: euskaraz edo erdaraz erantzun ahal izango dute, baina euskaraz egiteko eskatuko diote euskaraz dakiten guztiei.
Ahobizi edo Belarriprest izango garen erabaki ondoren, izena eman behar dugu.
Izen-ematea sustatzeko eta bideratzeko, hainbat tresna jarri ditugu martxan Añana Kuadrillan. Hala, datozen egunetan aurkeztuko dugu osatu dugun bideoa Euskaraldian parte hartzeko prest dauden gure hamar udalerrietako lagunekin. Era berean, irailean, Gaubean ospatu den Angostoko Azokan jarri dugun stand-ean Euskaraldian parte hartzeko dozenaka lagunen konpromiso idatzia ere bildu dugu. Bestetik, pixkanaka-pixkanaka, gure eskualdeko herri guztietako hainbat lagunen izen-abizenak ari gara jasotzen.
Honako bide hauek daude izena emateko: batetik, nahi duenak mezua bidali dezake anana@euskaraldia.eushelbidera, harremanetan jartzeko; bestela, online ere egin daiteke, www.euskaraldia.eus atarian dagoen izena emateko formularioaren bitartez. Azkenik, aipatu beharra dago Añanako Kuadrillako EUSKARALDIAren berri sare sozialen bitartez ere emango dela. Hauexek dira kontuak. Twitter: @AnanaEuskarald. Facebook: @AnanakoEuskaraldia. Jarrai iezaiezue.