Mendibilgo kontzejuak Vitoria Solar 1 zentral fotovoltaikoa instalatzeko Solariarekin sinatu zuen lurzoru komunalen alokairu kontratua bertan behera uzteko erabakia hartu du. Ebazpen horrekin, Mendibilek beste kontzeju batzuekin bat egiten du, hala nola Dura eta Arzubiagarekin, haiek ere uko egin baitzioten beren lurrak eguzki plantarako lagatzeari.
Arratzua-Ubarrundiako Horrela Ez plafaformak eta Mendibilgo kontzejuak azaldu dute hamazazpi hektareako lagapena aurreikusten duen alokairu kontratua eteteak "aldaketa garrantzitsua" dakarrela hasierako proiektuan, eta, horren ondorioz, gaur egun ez dakite nola "berregokituko" duten proiektua. Duela lau urte aurkeztu zuten Vitoria Solar 1 proiektua, "baina ez dago informaziorik egungo egoerari buruz", kontzejuko kideek esan dutenez.
Horrela Ez plataformak, gainera, Vitoria Solar 1 proiektuari emandako onarpen berezia ukatzeko eskatu dio aldundiari, ustezko arkeologia eremuan kokatzeagatik, herriguneetatik gertu kokatzeagatik eta balio estrategiko handiko nekazaritza lurrak okupatzeagatik.