"Enpresak eskainitako zerbitzuak ez du betetzen gutxieneko kalitate mailarik". Hori izan da Gorbeialdeko Kuadrillaren azken osoko bilkurak eman duen arrazoia hiri hondakin solidoen bilketa eta garraioa egiten duen Daorje enpresaren kontra bigarren zigor espedientea abiatzeko. Aho batez erabaki dute espedientea irekitzea.
Kuadrillak ohar baten bidez azaldu du, datozen egunetan, kontratistak aukera izango duela alegazioak aurkezteko, baita kuadrillak osatutako txostenean jasotako arau hausteak eta ez betetzeak ezetsi edo argudiatu ahal izateko ere. Iragan urteko abuztuan, kuadrillak beste zigor espediente bat abiatu zuen Daorjeren kontra, eta oraindik ebatzi ez den errekurtsoa jarri zuen enpresak auzitegietan.
Etorkizuneko aukerak
Gorbeialdeko Kuadrillak azaldu duenez, dagoeneko hasi da aztertzen kontratu hori amaitu eta gero zabor bilketa kudeatzeko plana zein izan daitekeen, eta txostenak agindu ditu edukiontzi guneak eta jasotzeko ibilbideak hobetzeko eta etorkizuneko kudeaketa ereduen inguruan. "Aspalditik dator arazoa eta bide judizialak luze joko du, oraindik ere" adierazi du Agustin Otsoa Eribeko kuadrillako presidenteak, "dena delarik, buru belarri gabiltza kuadrilla zein udal guztiak zerbitzu hau Gorbeialdeko bizilagunek merezi duten kalitateaz eskaintzeko lanean”.
Ildo horretan, aurrekontu zuzkidura berri bat onartu du kuadrillako osoko bilkurak partaidetzarako teknikari bat kontratatzeko, "lagunduko baitu hondakinen bilketarako zerbitzuak izan beharreko aldaketak hiritarrekin partekatzen eta gizarteratzen".
