Gorbeialdeko Kuadrillak aurreko urteetako joerari eutsi dio, eta berriz ere, Añanako Kuadrillaren atzetik, gaikako bilketan Arabako bigarren kuadrilla da. Hala, hondakin guztietatik %45 gaikako bilketa bidez jaso dute, herrietako edukiontzietan, Landa Gune Garbien bidez, eta puntu berde mugikorren bidez. Halere, behatokiak azpimarratu duenez, kuadrillako bilketa osoaren %14 Landa Gune Garbien (PLR) bidez egiten da, eta sistema hori ez omen da oso fidagarria, "nahastutako hondakinak hartzeko arrisku handia" duelako.
Sortutako hiri hondakinen kopuruari dagokionez, azken zortzi urteetan jasotako kopururik txikiena jaso da 2022an. Halere, behatokiak ohartarazi du Gorbeialdean ematen diren aldaketak ikusirik, itxaron egin beharko dela hondakin gutxiago sortzeko joera "aldaketa den baloratu ahal izateko". Guztira, 4.950 tona zabor sortu dute zazpi udalerrietan, Zuia buru dela (1.327 tona); eta 493 kilo zabor urtean herritar bakoitzeko.
