Gasteizen ere San Fermin jaien hasiera ospatu dute astelehen honetan, uztailaren 6an. 12:00etan, Nafarren Etxeko kideek txupinazoa bota dute Buruileria plazan, sanferminetako hasierarekin bat eginez. Zuriz eta gorriz jantzita, tradizioari jarraituz, parte hartzaileek euren jatorria eta Nafarroarekiko lotura gogoratu dituzte. Aurten, txupina pizten laguntzera gonbidatu dituzte alderdi politiko ezberdinetako ordezkariak, alkatea barne, eta baita Bizan adinekoen egoitzetako ordezkariak, besteak beste.
Urteen poderioz ohitura bihurtu da ekitaldi alaia. Txupinazoaren aurretik eta ondoren, musika eta jai giroa izan dira nagusi. Nafarren Etxeak berak izan du giroa berotzeko eta ospakizuna alaitzeko ardura, eta suziriaren ondoren dantzek eta musikak bete dute plaza. Gasteiztar ugari bildu dira ekitaldian, Sanferminen hasiera hiriburuan ere ospatzeko.
Argazkiak: EKAITZ ANDA / ALEA
