Justizia Kermanentzat herri plataformak deituta, ehunka herritarrek egin dute bat larunbatean Arka plazan antolatutako mobilizazioan, Kerman Villateren auzian "justizia" eskakizuna bizirik mantentzeko ahaleginean. Bertsoak, aurreskua eta minutu bateko isilunearekin gogoratu dute gaztea.
Probintzia Auzitegiak hartutako erabakiaren ostean deitu dute elkarretaratzea, Kermani eraso zion Mitika diskotekako atezaina aske utzi eta delitu eskaera arindu ondoren. "Kermanen heriotza ez zen istripu bat izan. Dokumentazioak argi erakusten du: azpikeriaz jokatu zuen atezainak", nabarmendu dute gurasoek plazan irakurritako oharrean. Ezbeharra gertatu baino 30 segundo lehenago kamerek grabatutako irudiek eraso "antolatua" izan zela frogatzen dutela esan dute, eta hasieratik instrukzio epaileak gertakariak hilketa gisa kalifikatu zituela, dokumentatutako frogetan oinarrituta. "Zer aldatu da ordutik? Zer gertatu da Auzitegi Probintzialak auzian halako aldaketa eragiteko, instrukzioaren sendotasuna alde batera utzita?
Gurasoek "inpotentzia eta inpunitate zantzuak" salatu dituzte, eta erakundeei eta herritarrei gogorarazi diete kasu honek familiaren minaz haragoko dimentsioa duela. "Udal gobernua, Mitika, LeBasque... Kerman, lokalaren segurtasunaren arduradunak hil zuen. Justizia egiteko ardura dutenek utzi dute libre hiltzailea. Zeri eutsi?".
Gurasoek eskerrak eman dizkiete "hilabete zail hauetan" laguntza eta berotasuna eskaini dieten senide, lagun eta herritar guztiei, eta bereziki nabarmendu dute Justizia Kermanentzat plataformak kasua ikusarazteko egindako lana.
