Erroldarik gabe izaterik ez! plataformatik mobilizazioa deitu dute ekainaren 5erako Gasteizen, udalak hartutako erabaki baztertzaileak salatzeko. Ehunka pertsonen erroldatzea oztopatzen aritzea leporatu diote, eta ohartarazi, ondorioz, oinarrizko eskubideak eskuratzea eragozten diela, izan babes soziala, osasun zerbitzuak edo lan eskubideak.
Udalak eskubiderik gabe uzten gaitu. Errolda eta eskubideak guztiontzat! lelopean egingo dute mobilizazioa, salatzeko udalak hartutako "erabaki politikoek" etxejabeen esku uzten dutela etxebizitza bateko bizilagunak erroldatzea. Berez, Estatuko legediaren arabera pertsona guztiek egon behar dute erroldatuta bizi diren udalerrian, eta bizi diren lekuan egin behar zaie errolda, kontuan hartu gabe etxebizitzaren egoera, ez eta titulartasunaren inguruko zalantza juridikoak ere.
Udalak, baina, etxearen jabea izatea edo alokairu kontratua izatea jartzen du ezinbesteko baldintza bezala erroldatu ahal izateko. Ondorioz, salatu dute errolda merkantzia bihurtzea ekarri dutela neurriok, jabe batzuek egoera hau baliatzen dutelako erroldak saltzeko, eta erroldarekin negozioa egiten duten mafiak sortu dira Gasteizen. Gainera, ohartarazi dute egoera zaurgarrienean dauden pertsonak direla "bidegabekeria hau zuzenean jasaten dutenak".
