Gabonak hurbiltzen ari diren honetan, azken prestaketak eta berrikuntzak antolatzen dabil udala. Etxe berria izango dute aurten Olentzero eta Mari Domingik, eta gainera, Antton Aranburuk ez du Olentzeroren rola hartuko. Aitor Vinagret aktorea izango da ikazkin mitologikoa gorpuztuko duena, eta bera arituko da karrozatik Gasteizko haurrak alaitzen.
Berarekin batera arituko da Ane Pedruzo, aurten ere Mari Domingiren paperean sartuko dena. Galtzagorriak, sorginak eta bestelako izaki magikoak izango dituzte bidelagun, eta Uraren Ezkutuko Lorategian egongo dira, haien etxe berrian, abenduaren 5etik aurrera. Haurrek eskutitzak uzteko aukera izango dute bertan, eta abenduaren 20, 21, 22 eta 23an ikusi ahal izango dituzte etxean bertan, beren laguntzaileen artean.
Aitor Vinagret hainbat proiektutan aritutakoa da Arabako antzerkigintzan, Josune Velez de Mendizabal edo Ane Gebararekin batera, esaterako. Gebararekin batera sortu zuen Patata minak ikuskizuna, lurraldeko herri askotara heldu dena.
Tradizio luzeko sokari segika
Hainbat pertsona igaro dira Olentzeroren jantzitik azken urteotan. Iñaki Lasak 26 urte eman zituen ikazkin larruan sartuta, 2017. urtera arte. Ordutik, lan berean aritu dira Koldo Rey, Mikel Epalza eta Antton Aranburu. Aurten, azalberrituta, Vinagretek jarraituko du tradizioa.
