Gasteizko Gazte Koordinadora Sozialistak eta Etxebizitza Sindikatuak txosna bat jarri dute Letren Fakultate parean, txosnagunetik metro gutxitara. Aurreko urte batzuetan ere jarri izan dute txosna alternatiboa, haiei parte hartzen uzten ez dietela salatzeko.
Abuztu hasieran berriz ere aldarrikatu zuten txosna jartzeko eskubidea Mugimendu Sozialistako bi eragileok, eta abuztuaren 4 eta 5erako egitaraua iragarri zuten. Gaur jakinarazi dutenez, Letretako Fakultatean jarritako txosnan eta oholtzan izango dira ekimen hauek.
Txosna Batzordeak ekainean argitaratutako ohar batean prestutasuna azaldu zuen urritik aurrera gatazka konpontzera bidean lan egiteko. GKS eta Etxebizitza Sindikatuak azken oharrean berretsi dute keinu hori begi onez ikusten dutela, baina ez dela egoera gainditzeko "bide orri zehatzik" existitzen. Hala ere, urrian irtenbidea adosteko prest agertu dira.
