Aldatu gidoia euskararen alde! lelopean, Euskal Herriko hainbat eragilek ikus-entzunezko politikak errotik aldatu daitezen eskatzeko manifestazioa egin dute gaur arratsaldez Gasteizko Foru Plazatik abiatuta.
Mugimenduko ordezkariek gogorarazi dute kultura eta ikus-entzunezko edukiak oso garrantzitsuak direla norbanakoaren garapenean, identitate kolektiboan eta gizarte kohesioan, eta topaketan kezka agertu dute Eusko Jaurlaritzak euskarazko kulturaren eta euskarazko ikus-entzunezkoen inguruan duen jarrerarekin. EITBk "sorrerako helburua baztertu" du, eta gaur egun gaztelaniak duela lehentasuna salatu dute. Horregatik, euskara erdigunean jarriko duten kultura eta ikus-entzunezko politikak ezarri daitezela eskatu dute antolatzaileek. "Herri bezala hazten jarraitzeko" euskarazko ikus-entzunezko eskaintza "zabala, duina, eguneratua eta erakargarria" beharrezko dela gaineratu dute, bai EiTBren eskaintzan, bai zineman eta streaming plataformetan.
Deialdiarekin bat egin dute ELA, LAB eta Steilas sindikatuek, Euskalgintzaren Kontseiluak, UEMAk, Euskaltzaleen Topaguneak, Euskal Herrian Euskaraz-ek, AEK-k, Ikastolen Elkarteak, Eskola Publikoaren Aldeko Plataformak eta askotariko talde eta eragile euskaltzalek.
#AldatuGidoia #EuskararenAlde lelopean, euskarazko kultura eta ikus-entzunezkoen alde elkartu dira ehunka lagun Gasteizen. pic.twitter.com/gRDN7scx3Y
— Arabako ALEA (@ArabakoALEA) May 18, 2024
