Irailaren 12a da berez Estibaliz eguna, baina ospakizun nagusia gertuen dagoen igandean egingo dute: hilaren 10ean, hain justu. Hortaz, egun horretan egingo dute erromeria, eta, ohi bezala, lurraldeko agintariak Juan Carlos Elizalde Gasteizko gotzainak gidatuko duen mezara zintzo-zintzo joango dira. Horrez gain, Gotzaindegiak aurreratu du adin guztietarako ekintzak egongo direla bertaratzen direnentzako.
Besteak beste, bezperan egingo dute bokazio erromesaldia. Aurten jubileua edo urte santua denez gero, erromesaldia egingo duten fededunek induljentzia eskuratzeko aukera izango dute. Zenbait baldintzaren arabera, beraz, Eliza Katolikoak bekatuak "barkatuko" dizkie.
Moja berrien esku
Ez da aurtengo nobedade bakarra izango: bekatuen barkamenak baino soka luzeagoa izango duen nobedadea egongo baita oraingoan. Bost urtez Erdi Aroko Araba elkartearen esku egon ostean, berriki santutegira iritsi diren Eukaristiaren Erromesak kongregazioko mojen esku geratuko da Pater taberna, bai eta historia elkarteak egoitza gisa erabili izan duen etxea ere. Elkarteak ezagutarazi du Estibalizi hertsiki lotuta jarraituko dutela hemendik aurrera ere, eta Erromanikoaren Interpretazio Zentroaren kudeaketa zein bisita gidatuak mantenduko dituztela. Abaguneaz baliatu dira eskerrak emateko urte hauetan Estibalizera hurbildu zaizkien lagun guztiei.