Ostiral honetan, udal eta foru hauteskundeetarako bederatzi egun eskas falta direnean, EITB Focus inkestaren azken emaitzak plazaratu dituzte, gaurkoan udal hauteskundeetara begira. Ondorio nagusia da EAJk irabaziko lukeela EAEko hiru hiriburuetan, baina EH Bildurekiko lehia estutu egingo litzatekeela Gasteizen. Arabaren kasuan, Gasteiz, Laudio eta Aguraingo udal hauteskundeen boto-asmoa aztertu du EITB taldeak.
Azken EITB Focus hau prestatzeko, EAEko 6.649 pertsona elkarrizketatu zituzten apirilaren 26tik maiatzaren 12ra bitartean: 1.543 Araban, 2.483, Bizkaian eta 2.623 Gipuzkoan. Nafarroan, aldiz, 1.204 galdekatu zituzten maiatzaren 3tik 11ra.
GASTEIZ
Hiriburuko boto-asmoaren inguruko EITB Focusen azterketaren arabera, Beatriz Artolazabal (EAJ) eta Rocio Vitero (EH Bildu) alkategaien artean puntu bakarreko aldea legoke; zehazki, 1,3 puntukoa.
EAJ izango litzateke indar bozkatuena (%25,2), eta zinegotzi bat gehiago lor lezake (7-8), baina EH Bilduk hazkunde handiagoa (%23,9) izango luke, eta berdinketa teknikorako aukera zabalik dago, bi alderdiek zazpina ordezkari lor bailezakete. PSE-EE bigarren izatetik hirugarren izatera jaitsiko litzateke, sei zinegotzietako bat galtzeko arriskuarekin. PPk bost zinegotziei eutsiko lieke, seigarrena lortzeko aukerekin. Azkenik, Elkarrekin Podemosek bi zinegotzi izango lituzke, gaur egun baino bat gutxiago.
LAUDIO
Aiaraldeko udalerri nagusiari dagokionez, EITB Focusen aurreikuspena da EAJk irabaziko lukeela Laudion, indar bozkatua izanik eta zazpi zinegotziei eutsita. Hala ere, EH Bilduk eta Omnia auzokide plataformak gehiengo osoa lortu eta gobernu aldaketa gauzatzeko aukera izango lukete.
PSEk, aldiz, puntu bat baino gehiago galduko luke, zinegotzi bat galduta.Azpimarragarria da EH Bilduk %6ko hazkundea lor lezakeela udalerrian, bost zinegotzitik seira igota. Elkarrekin Podemos eta PP berriz ere ordezkaritzarik gabe geratuko lirateke Laudion.
AGURAIN
Aurreko inkestan bezala, EITB Focusek Araban aurreikusitako aldaketa nagusia Lautadan emango litzateke: EH Bilduk Aguraingo alkatetza eskuratuko bailuke, EAJren boto kopurua gaindituz. Izan ere, udalerrian ordezkaritza duten bi alderdi horien arteko sorpassoa gertatuko litzateke, zazpigarren zinegotzia jeltzaleen eskuetatik subiranisten eskuetara pasatuz.
Oraingoz, PSEk ordezkaritzarik gabe jarraituko luke Agurainen, nahiz eta gertu geratu, boto kopuruan gora egin ostean.
