2021eko apirilaren 22an, Gasteizko hiri autobusen zerbitzua kudeatzen duen Tuvisa udal enpresako 427 langilek bat egin zuten Euskal Herriko Zerbitzu Publikoetan deitutako greba arrakastatsuarekin. Egun horretan lanuztea egin zuten pertsonek, normala denez, ez zuten jardunaldi horretako soldatarik jaso beren hurrengo nominan.
Hala ere, ezustekoa aurrerago iritsi zen: Tuvisako zuzendaritzak ez zuen lanegun hori benetako lan gisa zenbatu, eta egun hori berreskuratzera edo ordu saldotik kentzera behartu zituen greba egin zuten langileak.
ELA sindikatuak gertatutakoa salatu zuen epaitegietan, enpresa batzordeko gainerako sindikatuen babesarekin. Orain, Gasteizko Lan Arloko 2. zenbakiko Epaitegiak arrazoia eman die langileei, eta "grebarako oinarrizko eskubidea" urratu zela ebatzi du.
Ondorioz, 60.000 euro eman beharko dizkie langile horiei, lan eginarazi dizkien ordu gehigarriengatik. Hala ere, epaiari helegitea jartzeko asmoa iragarri du Tuvisako zuzendaritzak.