Enplegu publikoa sortzea, aldi baterako enplegua finkatzea eta pribatizazio prozesua salatzea dira ELA, LAB, CCOO, SATSE, STEILAS eta ESK sindikatuek sektore publiko osoan deitutako grebaren aldarrikapen nagusiak. Ohartarazi dutenez, sektore publikoko 60.000 langile inguru kontratu finkorik gabe daude gaur egun, eta behin-behinekotasuna %40tik gorakoa da.
Langile publiko guztiak daude parte hartzera deituta, eta sindikatuek "jarraipen zabala" izaten ari dela aurreratu dute, lehen balorazioan. Hala ere, salatu dute Eusko Jaurlaritzak "gehiegizko zerbitzu minimoak" ezarri dituela: besteak beste, zerbitzu minimoak %100ekoak izango dira Osakidetzan, Covid-19ari lotutako zereginetan; egoitza eta eguneko zentroetan ere, zuzeneko arretaren zerbitzuak %100ean mantenduko dira; ospitaleetan, larunbatetan izan ohi den lantaldeak bermatu beharko dira.
Arabako mobilizazio nagusiak Gasteizen eta Aiaraldean izango dira. 8:30ean, Aiaraldeko zerbitzu publikoetako langileek elkartasun ekimena egin dute Tubacexek Amurrion duen lantegian. 11:30ean, manifestazio bateratua abiatu da Gasteizko Plaza Berritik, eta milaka pertsona bildu ditu; udaletxean hasi, Eusko Legebiltzarretik igaro eta Diputazioraino iritsi dira. Arratsaldean, bi manifestazio irtengo dira Laudio eta Amurrioko herriko plazetatik.
Irudiak
Lehen orduko datuak aztertuta, EAEko sektore publikoan deitutako greba deialdia jarraipen zabala izaten ari da eta oso orokortua da behin-behinekotasuna pairatzen duten langileen artean
— LAB SINDIKATUA (@LABsindikatua) April 22, 2021
11:30ean, manifestazioak hiriburuetan#SORTUetaEGONKORTU#GEHIAGOetaEGONKORRA #BaduguAukera pic.twitter.com/KzMZez5QPN
Salbuespenezko neurriak
"Salbuespenezko egoera da, eta salbuespenezko neurriak behar dira", aldarrikatu dute sei sindikatuek, plantillak handitzeko, egungo ratioak hobetzeko eta lan kargak murrizteko eta arautzeko beharra azpimarratuz. Arazo horiei aurre egiteko, negoziazio kolektiboa aktibatzea "ezinbestekoa" dela uste dute.
Kontratazioari dagokionez, "gehiegizko" behin-behinekotasunari amaiera ematea nahi dute. Horretarako, plantillen behar guztiak identifikatu, azaleratu eta horien arabera handitzeko exijitu dute, egungo egoerara itzultzea saihesteko mekanismoekin batera.
Instituzioei mahai gainean dauden lege-proiektuak aldatzeko eskatu diete, "nahikoak ez direlako, ez dutelako enpleguaren kontsolidazioa bermatzen, ezta aldi baterako kontratazioaren gehiegikeriarekin amaitzen ere". Zentzu horretan, EAEko erakunde guztiak interpelatu dituzte, "Eusko Jaurlaritzatik hasi eta azken udaleraino, baita erakunde horietan ordezkaritza duten indar politiko guztiak ere", arau-aldaketak bultzatzeko.
Azkenik, martxan dauden lan eskaintza publikoko prozesuetan kolektibo bakoitzaren premiekin bat datozen ezohiko neurriak kontuan izatea eskatu dute. "Administrazioei pribatizazioen eta externalizazio politikekin amaitzeko eskatzen diegu; plantillak gaztetzeko eta aurretiko erretiroak sustatzeko plan bat ezinbestekoa dela uste dugu", gaineratu dute.
