Ruben Sanchez Bakaikoak bideratu du Eragiteko janzten jardunaldien hirugarren edizioko lehen saioa, euskaltegietako ordezkarien eta 40 lagun ingururen parte hartzearekin. Helduen euskalduntzea Gasteizen: motibazio iturrien bilakaera izan da lehen hitzordu honen ardatza, joan den asteko ALEAn argitaratutako Mende erdia Gasteiz euskalduntzen erreportajearen ildotik.
Datozen egunetan gaurko saioaren bideoa ikusgai izango da ALEAren webgunean, eta hurrengo saioak ere bideoan ikusteko aukera izango da, saio bakoitzetik egun batzuen burura.
Eragiteko janzten jardunaldiak
Berriz da abian Eragiteko janzten, Arabagara, GEU elkartea, Lazarraga, ALEA eta Euskaltzaleen Topagunearen ekimenez. 2021ean jarri zuten hazia, eta, 2022an eragiten jarraitzeko asmoa berretsi ostean, aurten ere itzuliko dira jardunaldiak. Gasteizko euskaltzaleen gogoetarako gune eta une bat da, esperientziak partekatu eta aberasten jarraitzeko.
Hirugarren edizioa, lau hilabetez luzatu beharrean, otsailean eta martxoan izango da, hil bakoitzaren 14an eta 28an; lau saioak asteartetan izango dira, 18:30ean. Eta Oihaneder Euskararen Etxerik edota Gasteiz Antzokirik ez dagoenez, Montehermoso Kulturunean egingo dira.
Saioen zein izen-ematearen inguruko xehetasun guztiak Euskaltzaleen Topagunearen webgunearen atal berezian aurki daitezke.
