Nolakoa izango da Izaskun Arrue Kulturgunea?

Erredakzioa 2022ko urr. 18a, 15:00

Udaberrian ateak irekitzeko bidean da Ruiz de Bergaratarren Jauregia. Obrak amaituta, bertan izan da ALEA, Euskararen Etxea eta Gasteiz Antzokia hartuko dituen eraikina lehen eskutik ezagutzeko.

Ruiz de Bergara jauregia berritzeko 2,6 milioi euroko inbertsioa egin da, eta Zikotz SA enpresak egin ditu lanak. Horri esker, egituran, isolamenduan eta beste egokitzapen batzuetan esku hartu da, eraikina Izaskun Arrue Kulturgunea hartzeko prest uzteko.

Kultur azpiegitura berriak bi sarrera eta lau solairu izango ditu:

  • Beheko solairurako (213 metro koadro) sarbidea Errementari kaletik izango da. Sarreratik gertu funtzio anitzeko aretoa izango da, eta bertan, erakusketak hitzaldiak edo proiekzioak egin ahal izango dira. Proiekzioetarako eta interpretaziorako kabina teknikoak ere egokitu dira, baita biltegiak, komunak eta aldagelak ere.
  • Lehen solairuan (349 metro koadro guztira), batez ere, Izaskun Arrue Kulturguneko espazio eszeniko nagusia egongo da. Zapatari kaletik edo Errementari kaletik izango du sarbidea. Zapatari kaleko atetik sartzean, ostalaritzako gune bat eta sukaldea aurkituko ditugu, eta, aurrera joanez gero, Gasteiz Antzokiaren areto nagusia topatuko dugu: 130 metro koadroko espazioa, bi solairukoa, askotariko ikuskizunak, kontzertuak edota antzerkia hartzeko balioko duena, eta zutik zein eserita ikusteko emanaldiak eskainiko dituena.
  • Bigarren solairuan (243 metro koadro) lantegiak, komunak eta lanerako beste gune batzuk izango dira. Solairu berean, Errementari kalera ematen duen eremuan, berriz, erabilera anitzeko gunea egongo da. Gune hori, aldi berean, balkoi gisa erabili ahal izango da Gasteiz Antzokiaren areto nagusian egiten diren ikuskizunetan; espazio horretan, jatorrizko adreiluz egindako sei arku ikusgarri daude.
  • Hirugarren solairua (292 metro koadro) da kulturguneko leku argitsuena, eta beste lan eremu bat izango da. Bertan, kristalarekin estalitako bilera aretoak, lantegi bat eta instalazio gela bat topatuko ditugu.
Erlazionatuak

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide