Musikaren bitartez eta bermut artean, memoria aldarrikatzea. Horixe zen premisa, eta halaxe egin zuten igande honetan Jimmy Jazz aretoan.
"Euskadin rokanrolak ez du inoiz dirurik emanen", zioen Hertzainak taldearen kanta batek. "Egia esan, inoiz ez du eman, baina rockak eta musikak soinu-banda handia eman diote Euskal Herriari bertsio ofizialaren aurka borrokatzeko; eta Gasteizko Martxoaren 3ko sarraskiak ere bere soinu-banda du", aldarrikatu du Martxoak 3 Elkarteko Lander Garciak, kontzertuekin batera egindako aurkezpenean.
"Musikak eta letrek Zaramagako sarraskia salatzen dute, eta 46 urtez beren akordeekin gure oroimena bizirik mantentzen lagundu dute". Izan ere, Martxoaren 3ari buruzko 37 abesti dokumentatu dituzte gaur egun arte: Lluis Llachena (Campanades a Morts) eta Pepe Taranto Moron flamenko-kantariarena (Copla flamenca al 3 de Marzo) izan ziren lehenengo biak. Ondoren, Gorka Knörr, Juanjo Uranga, Sabin Salaberri, A Tempo, Adeban, Koska, Zarama, Harlem, The Luto, Miel de Hiel, Kuraia, Mossin Nagant, Betagarri, Uraitz Soubies, Silikonay, Xuorum, Hachazo, Rockaina, El Trono de Judas, Ze Esatek, Los Chikos del Maiz, Habeas Corpus, More Too, Oliba Gorriak, Resaca Jackson, Kike Cosgaya & Jose Blanco, Soziedad Alkoholika, Kodigo Norte, Acera, Inurri Gorri, Giante, Errekaleor Bizirik, Azken Hatsa, M.D.Man, Jon Garai eta Republika del Miedo taldeen kantak iritsi ziren.
Momentuz azkena 2021ean sortu dute Handicap eta El Callejón de Cachán taldeek; bigarrenek igandeko saioan parte hartu zuten, La Excavadora, Don Inorrez, Pasadena eta MICErekin batera.