Igande gauean amaitu zen Gasteiz Hobetuz partaidetza-programaren barruan hiria hobetzeko aurkeztutako proposamenenak bozkatzeko epea. Bideragarritasun iragazkia 128 proiektuk gainditu zuten, eta horien artean bere lehentasunak adierazteko aukera izan dute 16 urtetik gorako gasteiztarrek.
Hirugarren edizio honetan, 7.786 lagunek eman dute botoa; pertsona bakoitzak hiru boto eman zitzakeenez, guztira 23.358 boto jaso dira: 4.839 online eman dira, Udalaren webgunearen bitartez, eta beste 2.947 modu presentzialean, gizarte etxeetako herritarrei laguntzeko bulegoetan, bulego teknikoetan eta Bizan Sareko zentroetan. Hortaz, 2018an izandako partaidetzaren bikoitza lortu du aurtengo edizioak —orduan, 3.368 pertsonak parte hartu zuten—.
Asteazkenean, ekitaldia
Hurrengo urratsa boto gehien jaso dituzten proiektuak ezagutaraztea izango da. Asteazken honetan, abenduaren 1ean, 18:30ean Europa biltzar jauregian egingo den ekitaldi batean emango dute horren berri. Proiektu horiek 2022 eta 2023an gauzatuko dira, Gasteiz Hobetuz programarako aurrekontuetan gordetako hiru milioi euroekin.
