Gorputzak gudu-zelai, Irati Garcia eta Nora Ziarsoloren eskutik Emakumeen Etxean

Irati Garcia eta Nora Ziarsolo ikertzaile independenteek gidatuko dituzte bi tailerrak.

Jabetze Feministarako Eskolan aurten eskainiko den euskarazko programazio zabalaren barruan, Irati Garciak Nire gorputza gudu-zelai bat da tailerra gidatuko du urritik maiatzera; urritik abendura, berriz, Nora Ziarsolok Gorputzak patriarkatuz gabetzea lantegia emango du.

Emakumeen Etxeak ikasturte berriari ekin dio jada, Jabetze Feministarako Eskolarekin. Etxanobe Jauregian kokatutako eta Gasteizko Udaleko Berdintasun Zerbitzua aldi baterako kudeatzen ari den espazioak, besteak beste, hitzaldiak, arte eszenikoak, proiekzioak, irakurle klubak, ikastaroak, lantegiak eta haurrentzako zein gazteentzako jarduerak eskainiko ditu datozen hilabeteetan.

Lehen jarduera batzuk egin dira dagoeneko, eta ikasturtea hitzorduz beterik dator. Aurten, gainera, euskarazko programazioa zabaltzeko ahalegin berezia egin dute. Horien artean, urrian antolatutako bi jarduera nabarmendu nahi izan dute Emakumeen Etxeko sustatzaileek.

Nire gorputza gudu-zelai bat da

"Posible al da feminista izatea eta konplexuak edukitzea? Uko egin al diezaiekegu edertasun-kanon matxistei eta, hala ere, ziurgabetasunekin jarraitu? Nahikoa al da neure burua maitatzea? Eta zer gertatzen da nire gorputza osasun arazo bat dela sentitzen badut?". Lantegi honetan, gai horiei buruz hausnartzen saiatuko dira, besteak beste, gorputz-bizipena landuz edertasun-kanonei, dietaren kulturari eta lodifobiari dagokienez. "Erresistentzia tresna berriak bilatzen ahaleginduko gara", azpimarratu dute.

Lantegi honen trebatzailea Irati Garcia izango da, ikertzaile independentea, emakume lodia eta feminista. Ostegunetan egingo da, 17:30etik 20:00etara, zortzi saiotan: urriaren 14an, azaroaren 4an, abenduaren 9an, urtarrilaren 13an, otsailaren 3an, martxoaren 10ean, apirilaren 7an eta maiatzaren 5ean.

Gorputzak patriarkatuz gabetzea

Beste lantegi honetan, "gorputzez eta sexualitateaz (bir)jabetzea" proposatuko da, "gorputzean bertan dauden jakituria eta plazera berreskuratuz, heteropatriarkatuak hainbat urtez desjabetu dizkigun ezagutzak eta jakintzak berreskuratzeko estrategia politiko gisa".

"Gure gorputzetan murgilduko gara, eta gorputzok desblokeatzen saiatu, bertan dauden altxorrak berreskuratzeko, gure sexualitatea eredu hegemonikoetatik askatzeko eta, halaber, askatasunetik eta gozamenetik berresteko, gure gorputzen eta bizitzen subiranotasuna eta autogestioa aldarri", azaldu dute antolatzaileek.

Trebatzailea Nora Ziarsolo Garate izango da, ikertzaile autonomoa. Heteropatriarkatuak emakumeen gorputzetan dituen eraginak aztertzen ditu, eta eragin horien ondorioak ikertzen, emakumeek beren buruarekin, gainerakoekin eta munduarekin duten harremanari dagokionez. Lantegi hau lau saiotan eskainiko da: urriaren 20an eta 27an, eta azaroaren 3an eta 10ean, 17:30etik 20:30era.

Erlazionatuak

Emakumeen Etxeak ikasturte berriari ekingo dio Jabetze Feministarako Eskolarekin

Gasteiz

Sare sozialetan presentzia handiagoa izateko asmoz, irudi korporatiboa eta webgunea berritu ditu Gasteizko Emakumeen Etxeak. Datorren astean, Jabet...

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide