Kultura Bizia

S.A., Anestesia, Olatz Salvador eta Pirritx, Porrotx eta Marimotots Iradier Arenan

Erredakzioa 2021ko urr. 6a, 12:30
Soziedad Alkoholika izango da Kultura Bizia espazioan.

Kultura Bizia egitasmoak 2022ko urtarrilera arte luzatuko du Iradier Arenaren erabilera. Iragarritako hamar hitzorduen artean, oholtzara igoko dira, besteak beste, Anestesia, Soziedad Alkoholika, Olatz Salvador, eta Pirritx, Porrotx eta Marimotots.

Pandemia betean kultura programatzeko espazio handi eta seguruen beharrari erantzuteko, apirilaren 12an aurkeztu zen Kultura Bizia espazioa. Maiatzetik aurrera 32.000 ikusle igaro dira Iradier Arenatik, antolatutako 90 ikuskizunetan. Orain, pandemiaren bilakaerak hobera egin duen arren, programazioa eta lankidetza gutxienez 2022ko urtarrilaren 10era arte luzatzea erabaki dute erakundeek eta Kultura Bizia elkarteak.

Hala iragarri dute gaur, Iradier Arenan bertan egindako prentsaurrekoan, Kultura foru diputatu Ana del Valek, Gasteizko Udaleko Kultura zinegotzi Estibaliz Cantok, Laboral Kutxako komunikazio arduradun Kepa Ortiz de Urbinak eta Kultura Bizia elkarteko lehendakari Jabolo Sagastumek.

Orain arte publikoaren erantzuna "oso ona" izan dela baloratu du Sagastumek. Bestalde, musika zein antzerki taldeentzat lana sortzeaz gain, programatutako egun bakoitzean —guztira, 61 egun— 35 pertsona inguru lanean ari direla azaldu du, horien artean 10-12 pertsonako talde bat jarraian. "Hori bultzada garrantzitsua izan da bizitzea egokitu zaigun garai honetan", ospatu du.

Hurrengo hitzorduak

Prentsaurrekoan, urtarrilera bitartean baieztatutako zenbait ekitaldi aurreratu dituzte. Orain arte bezala, ikuskizun horietarako sarrerak www.kulturabizia.eus webgunean erosi ahal izango dira:

  • Urriak 6 eta 7: Gasteiz On pasarela
  • Urriak 17: Miniature
  • Urriak 22: Boxeo gaualdia
  • Urriak 23: Korrontzi + Algara dantza taldea
  • Urriak 30: Stay Homas
  • Azaroak 26: Bakarrizketak | Agustin Jimenez, David Navarro eta Txabi Franquesa
  • Abenduak 11: Soziedad Alkoholika + Anestesia + Angelus Apatrida + Proudz
  • Abenduak 23: Olentzero ekitaldia | Mulixka dantza taldea + Coro Araba abesbatza + Luis Aranburu Kontserbatorioa
  • Urtarrilak 3: Pirritx, Porrotx eta Marimotots
  • Urtarrilak 7: Olatz Salvador + Idoia
Jabolo Sagastume, Ana del Val, Estibaliz Canto eta Kepa Ortiz de Urbina. / GASTEIZKO UDALA

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide