Etorkizunean Larragorri parkean Batan eta Zapardiel ibaien uholdeetatik babesteko proiektuan aurrera egiteko beste aurrerapauso bat eman duela iragarri du Gasteizko Udalak. Joan den astean Ura Uraren Euskal Agentziak iragarri zuen bertan ur baltsa handi bat egiteko lizitazioa hasita zuela, baina, aurrera egiteko, udalaren zain zegoela.
Orain udalak aurreratu du lan horiek aurrera egiteko "beharrezkoak diren hainbat tramite" egin dituela. Iragarri duenez, ostiral honetan Tokiko Gobernu Batzarrak bi dosier onetsi ditu. Batean, URArekin obrak gauzatzeko hitzarmena sinatzeko aukera eman dute. Bestean, Lasarteko legarretan eskubideak desjabetzeko tramiteei ekingo diete. "Eragindako ondasun eta eskubideen zerrenda jendaurreko informaziora aterako da", Arabako Lurralde Historikoaren Aldizkari Ofizialean argitaratuz. Ondoren, "banan-banan jakinaraziko zaie eragindako ondasun eta eskubideen titular gisa ageri direnei, alegazioak aurkezterik izan dezaten".
Udalaren arabera, proiektuari esker, Gasteiz hegoaldeko uholde arriskua murriztuko da.