Emakumeen pilota txapelketa hartuko du Ogeta pilotalekuak

Emakumeen I. Masters Gasteiz pilota txapelketaren aurkezpena. / GASTEIZKO UDALA

Beti Jai pilotalekuak berriro inauguratzeko ekitaldien barruan, Emakumeen I. Masters Gasteiz pilota txapelketa antolatu dute. Uztailaren 25ean eta abuztuaren 5ean eta 8an, esku pilota eta goma-paleta modalitateen hiru saio izango dira.

Gasteizko udako euskal pilotako programazioak beste ekitaldi bat gehitu dio pilota profesionala Beti Jai esparru berritura itzul dadin antolatutako udako egutegi mistoa osatzeko: uztailaren 25ean eta abuztuaren 5ean eta 8an, Emakumeen I. Masters Gasteiz pilota txapelketa egingo da Mendizorrotzeko Ogeta pilotalekuan.

Egitasmoa gaur aurkeztu dute Kirol eta Osasun zinegotzi Livia Lopezek eta Arabako Pilota Federazioko Oinarri eta Antolaketa koordinatzaile Aitor Ruiz de Luzuriagak. Nabarmendu dutenez, esku pilota eta goma-paleta modalitateetan erreferente diren emakume kirolari nagusietako batzuk bilduko ditu txapelketak.

Hamasei erreferente

Haizea Salanueva, Irati Ruiz de Azua, Uxue Agirresarobe, Ariane Arrieta, Miren Larrarte, Arrate Bergara, Olatz Arrizabalaga, Naroa Agirre, Ane Isasmendi, Itxaso Erasun, Ane Ibañez, Laura Saez, Iera Agirre, Olatz Ruiz de Larramendi, Leire Garai eta Nora Mendizabal dira txapelketan parte hartuko duten hamasei lagunak.

"Erreferente dira gazteen artean, eta nazioarte mailan, estatuan zein erkidegoan antolatzen diren ekitaldi nagusietan egon ohi dira", azpimarratu du Lopezek. Besteak beste, mundu mailako pilotariak daude kartelean, horietako batzuk Espainiako txapeldunak eta selekzioko kideak, mundu osoan pilotaren enbaxadorerik onenak direlakoan:

Gainera, "bizitzako esparru guztietan bezala, emakumea eskubidez dagokion tokia hartzen" ari dela nabarmendu du Ruiz de Luzuriagak, "kirol emaitzak, errendimendua eta oihartzun mediatikoa kontuan hartuta ere".

Txapelketa Udalak eta Arabako Euskal Pilota Federazioak antolatu dute, eta emakumeen pilota profesionala sustatzeko sortu berri diren EPE eta Club Ados erakundeen eta beste klub batzuen laguntza izan du.

Hiru jardunaldi

Txapelketak bi finalerdi izango ditu, eta, ondoren, final handiak. Finalerdietako lehena, palako pilota trinkoaren espezialitateari dagokiona, uztailaren 25ean izango da; beste finalerdia, ukitu erdiko pilotarena, abuztuaren 5ean; azkenik, bi diziplinetako finalak abuztuaren 8an izango dira.

Ekitaldi guztiak 19:00etan hasiko dira, Ogeta pilotalekuan. Sarrerak hamar euroren truke erosi ahal izango dira internet bidez edo leihatilan, jardunaldi bakoitza baino ordubete lehenago. 16 urtetik beherakoentzat, berriz, sarrerak doakoak izango dira.

Erlazionatuak

Masters txapelketarekin itzuliko da pilota profesionala Beti Jai frontoira

Gasteiz

Altuna III, Zabaleta, Ezkurdia, Tolosa, Elezkano II, Rezusta, P. Etxebarria, Martija, Olaizola II, Aranguren, Jaka, Imaz, Peña II, Mariezkur...

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide