Mendizorrotzeko igerileku estalietako ontzi txikia, Salburuko gizarte etxeko igerilekuetako ontzi handia eta San Andres kiroldegiko igerilekuetako ontzi txikia ere itxi behar izan ditu Gasteizko Udalak, pseudomona aeruginosa mikroorganismoaren neurketan ohiz kanpoko balioak agertu direlako.
Beraz, dagoeneko bost instalazioetako sei igerileku-ontzi daude itxita une honetan, kautelazko neurri gisa. Izan ere, asteazkenean beste hiru igerileku itxi zituen Udalak: Aldabeko gizarte etxeko igerilekuetako ontzi handia eta txikia, eta Ibaiondoko gizarte etxeko igeriketa-ontzia (igerileku ludikoak zabalik jarraitzen du).
Kasu guztietan, igerilekuen araudi tekniko-sanitarioa betetze aldera, balioak normaldu arte itxi egin dira igerilekuak. Bitartean, neurri zuzentzaileak aplikatuko dira, uraren kalitatearen parametro normalak erdiesteko. Berriro irekitzeko aukera izan bezain laster emango du Udalak horren berri.
Aldabe eta Ibaiondoko igerilekuak datozen orduetan berriro martxan izango dira, asteazkenetik itxita egon ostean. Izan ere, Gasteizko Udal Laborategiak bertako ura aztertu du eta emaitzek negatibo eman dute oraingoan; beraz, berriz ere uraren kalitatea egokia dela ondorioztatu dute.