Circulo Vitoriano lokalean egindako ekitaldian, Mikel Delika beiragile gasteiztarra hautatu dute 2020ko Urrezko Zeledon berria. Alde Zaharreko Txikita kalean duen tailerrean artisau gisa lan egiten du Delikak. Urte luzez, hainbat lan garrantzitsu sinatu ditu: Santa Maria katedralean edota Arrosarioko prozesioko farolen zaharberritzeaz gain, Comillaseko apaiztegian, Jaengo katedralean, Gernikako Batzar Etxean edo Aldundiaren Jauregian ere utzi du bere arrastoa.
Delikak jasotako saria "bihotzez" eskertu du. "Beirateak egiten dituen blusa bat naiz; ez dut bizitza ulertzen Gasteizko festarik gabe. Existituko ez balira, ez nuke jakingo zer egin", adierazi du artisauak.
Mikel Delikak 35 urte daramatza argiarekin, koloreekin eta testurekin "jolasten". 1983. urtean hasi zen, "kasualitatez", beirateak diseinatzen, sortzen eta zaharberritzen, eta "ezezaguna" den eta "arautu gabe" dagoen ogibide bat ezagutarazteko ahalegina ere egiten du. Bere lana hurbiletik ezagutzeko eta horren berri emateko erreportajea argitaratu zuen ALEAk 2018an: Betiko ogibidea arautzeko eta zabaltzeko beharra.
