UEUk antolatuta, 2015ean egin zen lehen edizioa Durangon, bigarrena 2017an Iruñean eta 2019an Baionan, arrakasta handiz. Egitasmo honen helburuak ikertzaile euskaldunak ikusgarri egin, harremanetan jarri eta euskarazko ikerketa sustatzea dira. Aurtengo edizioaren hasiera ekitaldian, Kepa Sarasola UEUko zuzendariak, Lexuri Ugarte Aldundiko Euskara zuzendariak, Blanca Urgell EHUko ordezkariak, Olatz Arbelaitz Ikergazte kongresuko zuzendariak eta Jokin Bildarratz Hezkuntza sailburuak parte hartu dute.
Jarraian, Ikergazte kongresuaren lehen jardunaldiarekin lotutako hainbat eduki:
- Katy Deepwell (hitzaldi nagusia): "Gure ikerketa foro desberdinetan partekatu eta eztabaidatzeko ardura dugu"
- Alazne Irigoien Dominguez (Uharte, 1992) ikergazteari elkarrizketa: "Zuzenbideak genero estereotipoak kontuan hartzen: EAEko kasuari erreferentzia bat". Alazne EHUn doktore tesia egiten ari da Zuzenbide Fakultatean, Zuzenbidearen Filosofiaren arloan, Ikasketa Feministak eta Generokoak Doktorego programaren baitan. Genero berdintasunaren inguruan atzerrian lan egin eta gero, orain ikerlari eta irakaslea da.
- Bideoa. Marina Landa ikergazteari elkarrizketa: "Abestiak eta sinbolismoa: hegan egitearen garrantzia euskal musika popularrean"
- Txerra Rodriguez Gomez ikergazteari elkarrizketa: "Euskara elkarteen inguruan oso ikerketa gutxi dago". Txerra soziolinguista eta hizkuntza aholkularia da, eta 30 urte mihigintzan liburua argitaratu berri du UEUrekin. Euskara elkarteek euskararen biziberritzean izan duten eragina aztertu du Rodriguezek.
Agenda | Ekainak 10, osteguna
- 09:00-10:00 Hitzaldi gonbidatua: Datuen zientziak COVID-19aren aurkako borrokan. Nuria Oliver, Telekomunikazio ingeniaria eta Inteligentzia Artifizialeko doktorea.
- 10:00-11:15 Mikroaurkezpenak
- 11:15-12:00 Atsedenaldia
- 12:00-14:15 Ahozko aurkezpenak
- 14:15-16:15 Bazkari etena
- 16:15- 17:50 Mahai ingurua: K++: Koronabirus osteari buruz esandakoei atzera begirada
- 18:00-20:00 Saio osagarri berezia eta afaritxoa
