SER irratiak jakitera eman duenez, Espainiako Auzitegi Gorenak ebatzi du Gasteizko Aljeriako elkarteko presidente ohia errugabea dela. Espainiako Poliziak 2018ko abenduan atxilotu zuen, 36 urte zituenean, Facebook sare sozialean emakume gazte bat jihadismoan dokrinatzea egotzita; emakume hori ezkutuko agente bat zen.
Orain, Manuel Marchena epailea buru duen Auzitegi Goreneko Zigor Arloko Salak ondorioztatu du Gasteizko bizilaguna ez zela saiatu emakumea ISISen sartzen. Gainera, epaileak nabarmendu du Siria edo bestelako eremu gatazkatsuetara joateko asmoa kendu ziola, baita ustezko lagun bati laguntza ekonomikoak bidaltzeko asmoa ere. Akusatuaren etxebizitzan ez zuten terrorismoarekin lotutako materialik aurkitu.
Ertzaintzaren konfidentea?
Are gehiago, Auzitegi Gorenak frogen analisi "erlazionatua eta kritikoa" ez egitea eta Ertzaintzaren konfidente bat ote zen ez aztertzea kritikatu dio Auzitegi Nazionalari.
I.Z. gasteiztarra aske dago jada, espetxean bi urte baino gehiago eman ostean.