Hiru hamarkada baino gehiago espetxean edo deportatuta igaro ditu. 1989an, Arakama ETAren ordezkaritzako kide izan zen Aljerren, Espainiako Gobernuarekin izandako negoziazioetan. Negoziazioen ostean, Santo Domingora deportatu zuten zortzi urtez, baina Dominikar Errepublikak 1997ko abuztuan entregatu zion Espainiako estatuari, 80ko hamarkadaren hasierako ETAren hainbat atentatu leporatuta.
Ondoren, 24 urte eman ditu preso Espainiako hainbat espetxetan, oso urrun eta askotan isolamendu egoeran; azken hamarkada ia osoa Sevillan. Espetxealdiaren azken txanpan Zuera (Zaragoza) edo Logroñoko espetxeetatik igaro da, eta azken hilabeteak Zaballako espetxean izan da, Araban, aske geratu aurretik.
2005ean, beste hainbat presorekin batera, gutun bat bidali zion ETAko zuzendaritzari, ezker abertzalearen norabide estrategikoa aldatzea proposatuz; aldaketa hori bost urte beranduago iritsiko zen.