Urtebete baino gehiago igaro da pandemia hasi zenetik, eta, neguko hotzak atzean utzita, udaberria heldu da Gasteizko Alde Zaharreko muinoko Euskararen Etxera. Horrela, hiruhileko berriari gogotsu heldu dio Oihanederrek, hogei jarduera inguruz osatutako diziplina anitzeko ekitaldi sorta zabalarekin.
Ekainera bitartean luzatuko den programaziotik, Gasteizko eragileekin elkarlanean antolatutako ekintzak nabarmendu ditu Oihanederrek. Izan ere, dozena bat elkarte, eragile eta kolektibok parte hartu dute udaberriko egitarauaren antolakuntzan, "euskal kultura balore segurua dela" aldarrikatzeko. Besteak beste, GEU elkartea, Baratza, Parasite kolektiboa, Topagunea, UEU, Hunkitu Arte elkartea, IKA, AEK, Gauekoak, ALEA edo JalgiVoz jaialdia izan dira.
Antolatzaileek azpimarratu dutenez, hiruhilekoan zehar, Oihaneder.eus webgunea izango da informazio iturri nagusia. Bertan topatu ahal izango da eguneratutako eta behin betiko informazioa, pandemiak eragindako azken orduko egokitzapenak kontuan hartuta.
Udaberriko jarduerak doakoak dira, baina gonbidapena eskuratu beharko da ohiko bideetatik: oihaneder@oihaneder.eus helbidera idatziz, telefonoz (945 16 18 30 – 615 98 68 32) edota webgunearen bitartez. Hainbat ikastaro eta jardunalditan, berriz, izena eman eta ordaindu beharko da parte hartzeko.
Jaialdiak
Oihanederrek sei urte daramatza apiril, maiatz eta ekaineko hilabeteetan Gasteizko hainbat eragilerekin jaialdiak elkarlanean antolatzen. Aurtengo udaberrian, bost jaialdi izango dira Euskararen Etxean:
- Maiatzaren 9an: Poetak Maiatzean jaialdiarekin elkarlanean, H-Artzetik, poesia musu zapietan, Txakur Gorria eta Peru Galbeteren ikuskizuna.
- Maiatzaren 19an: Laburbira, Euskarazko film laburren XVIII. zirkuitua.
- Ekainaren 6an: JalgiVoz jaialdiaren barruan, Euskal hitzetatik soinu unibersaleruntz, Miren Urbieta-Vega eta Amaia Zipitriaren kontzertua.
- Horiez gain, Zurrunbilo eta IkerGazte jaialdiekin elkarlanean, ekintza gehiago izango dira.
Zikloak
Gainera, jarraipena izango dute beste hilabete batzuetan ere antolatutako zikloek:
- Begi-Belarri ikusentzunezkoen zikloaren barruan:
- Apirilaren 14an, Ez, eskerrik asko! Gladysen leihoa dokumentala (gonbidapenak agortuta).
- Maiatzaren 12an, Anderea dokumentala.
- Eragiteko Janzten zikloaren barruan:
- Apirilaren 20an, Herritarrak eta euskara, aktibaziorako gakoak, Maialen Iñarra eta Zesar Martinezen eskutik.
- Maiatzaren 25ean, Arabako esperientzia komunitarioak Gasteizerako eredu?, Gartzen Garaio, Oskar Garcia de Bikuña eta Jon Ruiz de Pinedoren eskutik.
- Saski Naski sorkuntza artistikoen otzara: apirilaren 18an, Kax-kax-kax!, Katixa Agirre eta Maite Larbururen eskutik (gonbidapenak agortuta).
- Ahoskera Laborategia ikastaroa: apirilaren 17an, Julia Marinen eskutik.
- Hitz Adina Mintzo: apirilaren 21ean, Kalaallisut: groelandiera, Txerra Rodriguez eta Eider Palmouren eskutik.
- Batera deialdiko aurkezpen publikoak:
- Filmazpit zikloa, zinema jatorrizko bertsioan euskaraz azpititulatuta:
- Maiatzaren 4an, Hamada, Eloy Dominguez, 2018 - Suedia.
- Ekainaren 1ean, Homosexualitatea film laburrean, hainbat egileren eskutik.
Kontzertuak
Ohi bezala, Oihaneder Euskararen Etxeak euskal musikarientzako oholtza eskainiko du:
- Apirilaren 22an, Serge, Leihotik mundura diskoa aurkezteko.
- Maiatzaren 6an, Urko Buruaga, Egin Leku! deialdiaren barruan.
- Maiatzaren 27an, Idoia, Ilun eta abar proiektuarekin, eta Eskilarapeko Soinuak zikloaren barruan.
- Ekainaren 3an, Ihana, Egin Leku! deialdiaren barruan.
Nobedadea: Taulara lehiaketa
Udaberriko berrikuntza nagusia Taulara mikroantzerki lehiaketaren lehenengo edizioa martxan jartzea izango da. Formatu txikiko antzezlan eta bakarrizketentzako deialdi irekia da, eta euskarazko antzezlan laburren sormena suspertu nahi du.
Jasotako proposamen guztien artean, hiru lan aukeratuko dira. Horietako bakoitzak 600 euroko saria jasoko du. Lan irabazleak ekainaren 18an aurkeztuko dira Oihanederren, eta saio horretan emango da laugarren saria, publikoarena. Proiektuak bidaltzeko epea martxoaren 29tik maiatzaren 3ra arte egongo da zabalik.
