Martxoak 3 Elkartea, Sanfermines78 Gogoan eta Egiari Zor Fundazioko ordezkariek, Memoria Osoa sarea osatzen duten hamalau erakunde memorialisten izenean, Gasteizko Udaleko gizarte politiken batzordean parte hartu dute ostegun honetan.
Bertan, abenduan aurkeztutako dinamikaren eta horren printzipioen inguruan mintzatu dira udal ordezkarien aurrean: "Bizikidetzak planteatzen dituen erronkei diskriminaziorik gabe eta gertatu denaren ikuspegi integralarekin heltzeko beharra", azpimarratu dute.
Joan den abenduan, Giza Eskubideen Nazioarteko Egunean, Terrorismoaren Biktimen Oroimenerako Zentro Nazionala abian jartzeak dakartzan "eredu diskriminatzailea eta planteamendu baztertzailea" kritikatu zituzten Euskal Herriko hainbat memoria eragilek. Proiektua "bizikidetzaren eraikuntzaren aurkako erasoa" dela salatu zuten.
Memoria Osoa egitasmoko ordezkariek azaldu dutenez, datozen asteetan ekimen gehiago aurreikusi dituzte. Besteak beste, hezkuntza arloko eragileekin bilera erronda bat egingo dute, komunitate horren barruan bizikidetza "modu inklusiboan eta ez-diskriminatzailean" jorratzearen garrantziaz kontzientziatzeko, eta baita haren babesa eskatzeko.
