Astelehen honetan urrats gehiago eman dituzte Aldaialdeko familiek. Alde batetik, ikastetxeko obrak lizitatzea eskatzeko manifestazio koloretsua egin dute Eusko Legebiltzarraren inguruan: "Erakundeei eta kargu publikoei gogorarazten diegu Aldaialde eraikitzea premiazkoa dela, eta egoera hori berehala desblokeatu behar dutela; ezin dugu atzerapen edo engainu gehiagorik onartu", azpimarratu dute.
#Aldaialde.ko ikasle eta gurasoak legebiltzar aurrean eskola behingoz eraikitzeko eskatzen!
— Maria Garde (@mariagardee) February 15, 2021
Barruan, laster @Aldaiaberri_GE.ko kideak entzungo ditugu hezkuntza batzordean...
5 URTE BARRAKOIETAN, ASKI DA! pic.twitter.com/QFvDFoNWa7
Bitartean, parlamentuaren barruan, Aldaiaberri Guraso Elkarteak Legebiltzarreko Hezkuntza Batzordean parte hartu du. Bertan, familien egoera azaldu dute eta Eusko Jaurlaritzari dagozkion azalpenak eskatu dizkiote, lizitazioaren argitalpena ez atzeratzeko exijituz.
Joan den astean, Aldaialde eraikitzeko "behin betiko irtenbide teknikoa" iragarri zuen Gorka Urtaran alkateak. Izan ere, Udalak hirugarren obra-lizentzia eman du, eta orain Eusko Jaurlaritzak argitaratu behar du lizitazioa, obrak esleitu eta gauzatu ahal izateko.
Euren seme-alabek bost urte barrakoietan igaro ostean, familiek positibotzat jo dute albistea, baina "irtenbide partziala" dela diote, eraikina altxatzeari lehentasuna emango zaion arren, bigarren fase bat "zintzilik" geratuko litzatekeelako: patioa, baratzea eta aparkalekua, lurperatze-planak eragindako lursailaren zatian.
"Lanak hasteko itxaropena izan arren, ziurgabetasun handia dugu", azaldu du Guraso Elkarteak, "ematen den hirugarren lizentzia delako eta orain Eusko Jaurlaritzak obrak lehenbailehen lizitatu arte itxaron behar delako".
