Kutxabankek bere bulegoetan leihatila zerbitzua bermatzen jarrai dezala eskatu du EH Bilduk, mozio bidez, astearte honetako udalbatzan. Mozioa aurrera atera da Udaleko osoko bilkuran. Izan ere, alderdi guztiek bat egin dute Kutxabanki eta gainerako banketxeei eskatzeko «bulegoetan leihatila zerbitzua eskaintzen jarraitzea, egun eta ordu jakin batzuetan behintzat».
Hilabete honetan jakin da Kutxabankek Gasteizko bulegoen laurden batean leihatilako zerbitzua eta arreta emateari uzteko erabakia hartu duela. «Adinekoei, ahulenei eta baliabide gutxien dituztenei kalte egiten dien erabakia da», kritikatu du Iratxe Lopez de Aberasturi EH Bilduko zinegotziak.
EH Bilduk gogora ekarri duenez, 2012ko urtarrilaren 1ean sortu zen Kutxabank, eta aurrezki kutxen finantza aktiboak bideratzeko banku gisa abiatu zen. Akziodun bakarrak Arabako Vital Kutxa, Bizkaiko BBK eta Gipuzkoako Kutxa ziren orduan, baina gerora aurrezki kutxak desagerrarazi eta banku fundazio bihurtu ziren.
«Ezin dugu ahaztu erakunde honek Gasteizko Udalarekin eta Arabako Aldundiarekin duen lotura; aurrezki-kutxen sorreran erakunde fundatzaileak izan ziren», nabarmendu du Lopez de Aberasturik. «Eta, gaur egun, bi erakundeek fundazioaren patronatuko ordezkariak izendatzen dituzte».
