Gasteizko Udalak ohar batean azaldu duenez, hondakinak deskargatu ondoren, 4:25ak aldera, udal zerbitzuko zabor-bilketarako kamioi baten gidaria konturatu da gizonezko bat zegoela lantegiko deskarga-hobian. Berehala, gertatutakoaren berri eman die larrialdi zerbitzuei zein lantegiko arduradunei.
Suhiltzaileak, udaltzainak eta anbulantzia bat joan dira pertsona erreskatatzera. Gizona bere kordean zegoen, baina zango batean zauritu da. Ospitalera eraman dute, laguntza medikoa eman ziezaioten.
2020an, hildako bat
Gaurkoan, zorte hobea izan du Jundizko biokonpost lantegian agertutako gizonak, baina duela urtebete inguru, 2020ko otsailean, hildako gizonezko baten gorpua agertu zen bertan. Edukiontzi grisak biltzeko kamioi batean iritsi zen Issamen gorpua, eta kasuak agerian utzi zuen Gasteizen dagoen bizitoki larrialdia.