Gasteizko Hizkuntza Aniztasunaren Topaketen bigarren saioa urriaren 23an izan zen, Oihaneder euskararen etxean. Senegaleko hainbat lagun bildu ziren Mbolo elkartearen bidez. Guztira, zazpi heldu —lau gizon eta hiru emakume— eta lau ume izan ziren.
Azaldu dutenez, Gasteizen Senegaleko komunitate handi samarra dago; 350 gasteiztar baino gehiagok jatorri senegaldarra dute. Euren jatorrizko herrialdean hainbat hizkuntza hitz egiten badira ere, wolofera da zabalduena, eta solasaldia bera woloferaz egin zuten. Bukaeran, Senegaleko doinuekin kantatzen eta dantzatzen ibili ziren, eta solasaldian parte hartzeko aukera emateagatik esker onez mintzatu ziren.
Mbolo elkarteko Issa Sambek laburbildu du AnHitzak topaketen bigarren saioa. Teranga!
AnHitzak, hizkuntza eta aniztasuna
2016an, lehen aldiz, AnHitzak Gasteizko Hizkuntza Aniztasunaren Topaketak antolatu ziren Oihaneder Euskararen Etxean. Aurtengo edizioan, osasun egoerak baldintzatuta eta segurtasun neurri bereziak tarteko, taldez talde ari dira garatzen.
Oraingoan ere, Gasteizko hizkuntza aniztasunaz, transmisioaz eta euskararekiko harremanez solasean ibili dira. Hurrengo asteotan, Euskaltzaleen Topaguneak eta Gasteizko Udalak topaketak publikoki aurkeztuko dituzte. Gainera, ALEArekin lankidetzan, saio guztien laburpenak bideoz jasoko dira, eta astean behin horietako baten berri izango duzue.
