Datorren astean, Tuvisak hobetuko ditu 7. lineako maiztasunak, eta %100ean funtzionatuko du, pandemiaren aurreko zerbitzua berreskuratuz.
Horrela, 2, 4, 5, 6 eta 7 lineak izango dira %100ean; izan ere, beste lau linea horietan zerbitzuak pandemiaren aurreko maiztasunak berreskuratu zituzten lehenago, puntako orduetan erabiltzaile gehien izan ohi dituzten lineak baitira.
7. linearen kasuan, ordea, berriki iritsi da pandemiaren aurreko okupazioaren %50era; bereziki, puntako orduetan, hau da, 7:30etik 9:00era bitartean eta 12:30etik 17:30era bitartean. Ondorioz, ekin zaio maiztasunaren hobekuntzari.
| LINEA | Erabilera (%), 2019koaren aldean | Egungo eskaintza (%), 2019koaren aldean |
| 6 | %57,47 | %100 |
| 4 | %59,18 | %100 |
| 5 | %64,43 | %100 |
| 2A | %56,57 | %100 |
| 7 | %45,33 | %63 |
| 2B | %54,01 | %100 |
| 10 | %47,85 | %63 |
| 1 | %43,94 | %75 |
| 8 | %43,52 | %75 |
| 3 | %70,47 | %57 |
| 9 | %39,57 | %57 |
Asteko berrikuspena
Azken asteetan kritika ugari jaso dituzten arren, Mugikortasunaren eta Espazio Publikoaren zinegotzi eta Tuvisako lehendakari Raimundo Ruiz de Escuderok gogorarazi du udal garraio enpresak zerbitzuaren eskaintza eta eskaria astero aztertzen dituela. "Gasteizen, Tuvisako autobusak erabiltzen dituzten bidaiarien eskaria %55aren eta %60aren artean dago, 2019koaren aldean. Eta eskaintza %85era igo da azken lanegun hauetan", adierazi du.
Gainera, azpimarratu du Tuvisak 140.000 euro inbertitu dituela Covid-19aren kontrako berariazko zerbitzuetan: norbera babesteko ekipoak, garbiketa produktuak eta berariazko garbiketak, besteak beste. Gainera, birusa agertu zenean ezarri ziren neurri sanitarioei eutsi egin zaie.
