Astelehen honetako arratsaldean, txupina lehertzearekin batera hasiko dira Gasteizko Alde Zaharreko jaiak. Auzoaz kutsa zaitez! lelopean, bere hamabigarren edizioari helduko dio Zaharraz Harrok, auzotik eta auzoarentzako sortutako jai autogestionatu eta partehartzaileak. Egitarau oparoa osatu dute ekainaren 28ra bitartean, Alde Zaharrari bizitasuna eta kolorea emateko: hitzaldiak, mahai-inguruak, bertso saioak, musika emanaldiak, umeentzako ekintzak, kaleko zinema, kirol jarduerak…
Badatoz Zaharraz Harro jaiak!! Aurten ekainaren 22tik 28ra auzo harrotasunaz eta autogestioaz auzoa kutsatzera goaz!! Prest??
— Zaharraz Harro (@ZaharrazHarro) June 12, 2020
¡¡Ya vienen las fiestas de Zaharraz Harro!! ¡¡Del 22 al 28 de junio nos vacunaremos con el orgullo de barrio y la autogestión!! Preparada?? #ZaharrazHarro pic.twitter.com/GGELMobSA3
Aste osoan zehar zenbait erakusketa eta azoka egongo dira auzotik. Zaharraz Harroko kideek argazki erakusketa osatu dute Alde Zaharreko iragana gertuagotik ezagutzeko; ibilbide bat prestatu dute kaleetan zehar argazkiak jarraitu ahal izateko. Gainera, Zapateneo kultur elkarteak banatzaileen eta liburuen azoka jarriko du martxan ekainaren 23tik 27ra, Zapatari kalean bertan.
Aldarrikapenerako tartea ere izango da aurtengo Zaharraz Harron. Ostiralean, ekainak 26, Auzoan Bizi plataformak manifestazioa egingo du Alde Zaharrean zein Gasteizen bizi den etxebizitza larrialdi egoera salatzeko. Ekainaren 28an, LGTB+ askapenaren nazioarteko egunean, E28 koordinadorak deitu duen mobilizazioarekin bat egingo du Zaharraz Harrok.
Berri hau Hala Bedik argitaratu du eta Creative Commons by-sa lizentziari esker ekarri dugu ALEAra. Jatorrizko albistea hemen duzu ikusgai, osorik.
