Gasteizko Txagorritxuko ospitalean, gaur goizean, adineko emakume bat hil da. San Martin auzoan, Sanitasek kudeatzen duen zentro batean zegoen emakumea eta koronabirusarekin kutsatu zen bertan. Egoitza horretan dauden zaharren artean jazo den hirugarren heriotza da, eta, familietako iturrien arabera, beste bi adineko daude larri.
Sanitasek igande gauean azaldu zuenez, 22 laguni hauteman diete koronabirusa, tartean 4 langileri.
Gasteizen zendutako emakumearekin batera, dagoeneko, zortzi dira birusak Euskal Herrian eragin dituen biktimak. Izan ere, Osasun sailak goizean igorri duen prentsa oharraren arabera, Gipuzkoan, 86 urteko gizonezko bat hil da gaur goizean.
