'Araban da, bai, baina...' lehiaketaren lehenengo saria Nagore Armentiak irabazi du

Nagore Armentiak irabazi du lehiaketaren lehenengo saria. / Argazkia: IKA

Lehenengo hiru argazkien irabazlea Nagore Armentia izan da. Arabako produktuez osatutako kutxa bat lortu du.

Aurten hogeita hamaikagarren urteurrena ospatuko du IKAk eta, hori dela eta, ALEAren irakurle guztiekin partekatu eta guztioi aukera eman nahi izan diote urtero euskaltegian antolatzen duten 'Araban da, bai, baina...' lehiaketan parte hartzeko.

Hiru astean behin, Arabako produktuez osatutako kutxa bat zozketatuko dute erantzunak asmatzen dituztenen artean eta, horretaz gain, irabazleek Alea taldea osatuko dute abenduaren 19ko Gasteizko euskaltegien arteko finalean.

Lehiaketa Araban dagoen dorre, haitz, ur-jauzi, eskultura… baten argazkiari buruzko galderari erantzutean datza. Lehenengo hiru argazkiak errota bat, mendi bat eta karobi bat izan dira. Horien erantzunak asmatu dituztenen artean, lehenengo irabazlea atera da dagoeneko.

Astero lehiaketaren edizio berri bat topatuko duzue Alearen webguneko IKA31 atal berezian.

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide