Bi aste igaro dira Klimaren Aldeko Grebatik. Irailaren 27an, mobilizazio jendetsuak egin ziren mundu mailan, baita Gasteizen ere. Ehunka lagun bildu ziren Plaza Berrian, "B planetarik" ez dagoela gogorarazteko.
Egun berean, "larrialdi klimatikoa" deklaratu zuen Gasteizko Udalak. Ordutik, aldaketa klimatikoari aurre egiteko "pisuzko neurririk" ez duela proposatu leporatu diote Udalari Gasteizko FFF mugimendua osatzen duten ehunka eragilek.
Gainera, azken egunetan, Arabako Foru Aldundiak, Gasteizko Udalak eta Eusko Jaurlaritzak Ryanairrekin duten hitzarmena berrizteko asmoa adierazi du. Honen aurrean, erakunde publikoek "garraiobide kutsakorrena diruz laguntzen jarraitzea ulergaitza" dela gogor salatu dute.
Udalean ordezkatutako talde politikoekin biltzeko asmoa adierazi du mugimenduak. Bileraren helburua irailaren 27an "kalean" eskatutako neurriak "lehenbailehen" martxan jartzea izango da:
- Ryanair enpresari ematen zaizikion diru laguntzak ez berritzea.
- Gasteizko hiri barruko garraio publikoa dohainik jartzea.
- Energia berrizatagarrien produkzio eta banaketarako enpresa publiko bat sortzea.
Azken puntu honen harira, elektrizitatearen produkzioa berotegi-efektua sortzen duten gasen isurketaren "jatorri nagusietako bat" dela ohartarazi dute: "Erregai fosiletatik energia berriztagarrietarako trantsizioa lehenbailehen" egin behar dela azpimarratu dute.
