Iragan uztailean, ur eta argi mozketa egin zioten Olarizuko Hiribideko 100 auzokide ingururi, tartean 20 haur baino gehiago zeudela. Gaur goizeko 8.00ak aldera, auzoko bloke okupatuetan ur mozketa berri bat izan dute.
Hala Bedik jakinarazi duen bezala, ura mozteaz gain, estoldak zementatu dituzte, dirudienez auzokideek ur-hornidura berreskuratu ez dezaten.
Etxebizitzak hustu eta eraitsi nahi ditu Ensanche 21 erakundeak. Uztailean, Gasteizko eragile ezberdinek "jarrera arrazistak" salatu zituzten Olarizuko huste-prozesuan. Tartean, Ongi Etorri Errefuxiatuak, Stop Desahucios, Elkartzen, Gasteizko Plataforma Antirrazista, Herrien Kongresua, Gasteizko Eskubide Sozialen Aldeko Plataforma eta Olarizuko Bizilagunak taldeak zeuden.
Ildo horretan ere, "erakundeen axolagabekeria" kritikatu zuten kolektibo hauek, Udalak 451 etxebizitza huts dituela gogoraraziz. Hiriko aterpea beteta dagoela eta larrialdietarako pisuak gainezka daudela ere ohartarazi zuten, auzokideen larrialdi-egoera azpimarratuz.