Datorren igandea bitartean, egitarau zabala antolatu dute Alde Zaharreko bizilagunek. Parte-hartzea, auzolana eta auzo harrotasuna oinarri, orain dela 11 urte hasitako Alde Zaharreko jaiek, 80 jarduera inguru prestatu dituzte.
Gaurkoan gainera, beroaldiari aurre egiteko asmoz, "auzo igerilekua" ireki nahi izan dute eguerdian, Kutxin bertan. Albistearen berri jakin ahala, zenbait udaltzain bertaratu dira. Baina egoeraren berri jaso ostean, berdinetan egoten utzi diete auzokideei.
Horrenbestez, asteburu osoan zehar igerilekuaz gozatzeko aukera egongo da, 10:00etatik 22:00ak arte. Izan ere, jabearekin akordio batera iristea lortu dute gunera sartutako gazteek.
Nahi duen edonori gerturatzeko gonbidapena luzatu diote gainera. Hori bai, igerilekua posible egiteko, zenbait konpromiso eskatu dizkiete bertaratzen direnei: espazioa zaintzea, bizilagunak errespetatzea eta gunea garbi mantentzeko ardura izatea, besteak beste.
